भारतीय महिला हक्की टोलीले डिफेन्डिङ च्याम्पियन चीनलाई १-० ले पराजित गर्दै ४४ वर्षपछि एसियाली खेलकुदमा स्वर्ण पदक जितेको छ। यो जितसँगै भारतले २०२८ लस एन्जलस ओलम्पिकमा सिधै स्थान पनि सुरक्षित गरेको छ।
खेलको १०औँ मिनेटमा लालरेमसियामीले उत्कृष्ट टोमाहकमार्फत भारतका लागि निर्णायक गोल गरिन्। त्यसपछि भारतीय टोलीले चिनियाँ टोलीका लगातार आक्रमणलाई विफल पार्दै रक्षामा उत्कृष्ट प्रदर्शन गर्यो। अनुभवी गोलकिपर सविता पुनियाले पेनाल्टी स्ट्रोकसमेत बचाएकी थिइन्।
यससँगै भारतले महिला हक्कीमा दोस्रो एसियाली खेलकुद स्वर्ण पदक जित्न ४४ वर्षदेखि गरेको प्रतीक्षा समाप्त भएको छ।
भारतले महिला हक्कीको स्वर्ण पदक यसअघि सन् १९८२ मा मात्र जितेको थियो। त्यसबेला महिला हक्कीले एसियाली खेलकुदमा डेब्यू गरेको थियो। त्यसपछि भारत दुई पटक उपाधि नजिक पुगे पनि उपविजेतामै सीमित भएको थियो। भारत सन् १९९८ मा दक्षिण कोरिया र २०१८ मा जापानसँग पराजित भएको थियो।
पेरिस ओलम्पिकको रजत पदक विजेता चीनले रजत पदकमै चित्त बुझायो। तेस्रो स्थानका लागि भएको खेलमा जापानले दक्षिण कोरियालाई पेनाल्टीमा ४-२ ले पराजित गर्दै कांस्य पदक जितेको छ।
प्रतिक्रिया