काठमाडौँ। आश्विन ३१ गते निर्वाचन आयोगले वि.सं. २०८१ साउन १ गतेदेखि २०८२ असार मसान्तसम्म सम्पादन गरेका मुख्य काम कारबाही र उपलब्धि समावेश भएको उन्नाइसौँ वार्षिक प्रतिवेदन सम्माननीय राष्ट्रपतिज्यूलाई बुझाएको छ।
शुक्रबार राष्ट्रपति भवन शीतलनिवासमा आयोजित कार्यक्रममा आयोगका माननीय कार्यवाहक प्रमुख निर्वाचन आयुक्त रामप्रसाद भण्डारीज्यूले उक्त प्रतिवेदन राष्ट्रपति समक्ष पेश गर्नुभएको हो।
प्रतिवेदन बुझ्दै सम्माननीय राष्ट्रपतिज्यूले आर्थिक वर्ष २०८१/८२ मा आयोगले गरेका कामको लागि धन्यवाद व्यक्त गर्नुहुँदै, आगामी २०८२ फागुन २१ मा सम्पन्न हुन गइरहेको प्रतिनिधि सभा सदस्य निर्वाचन समेत सफलतापूर्वक सम्पन्न हुने विश्वास व्यक्त गर्नुभएको छ।
आयोगका कार्यवाहक प्रमुख निर्वाचन आयुक्त भण्डारीज्यूले प्रतिवेदन पेश गर्दै आर्थिक वर्ष २०८१/८२ मा आयोगले मतदाता नामावली दर्ता तथा अध्यावधिक, स्थानीय तहका ४४ पदमा उपनिर्वाचन, मतदाता शिक्षा र तालिम सञ्चालन, राजनीतिक दल दर्ता र अध्यावधिक गरेको जानकारी गराउनुभयो। उहाँले आयोगको कानूनी, संस्थागत तथा प्रणालीगत सुधारका लागि चौथो पञ्चवर्षीय रणनीतिक योजना स्वीकृत गरी कार्यान्वयन गरिएको पनि उल्लेख गर्नुभयो।
कार्यवाहक प्रमुख आयुक्त भण्डारीज्यूले प्रतिनिधि सभा सदस्य निर्वाचन, २०८२ सम्पन्न गर्न लगायत आयोगले सम्पन्न गर्ने कार्यमा राजनीतिक दल र सबै सरोकारवालाको सहयोग प्राप्त हुने विश्वास पनि व्यक्त गर्नुभयो।
कार्यक्रममा माननीय निर्वाचन आयुक्त डा. जानकी कुमारी तुलाधर र सगुन शमशेर ज.ब.रा., आयोगका सचिव माधवदेव पन्त र सम्माननीय राष्ट्रपतिज्यूका विज्ञ सल्लाहकारहरू एवम् राष्ट्रपति कार्यालयका सचिव डा. दिपक काफ्लेको उपस्थिति रहेको थियो।
प्रतिक्रिया