पहिलो संस्करणको जापानिज एजुकेसन ग्रुप फुटसल प्रतियोगितामा न्यू होराइजन माइग्रेसनल एन्ड एजेकेशन प्राली च्याम्पियन भएको छ ।

काठमाडौंको बुढानीलकण्ठस्थित कपअन स्पोटर्स सेन्टरमा आइतबार भएको प्रतियोगितामा न्यू होराइजन च्याम्पियन भएको हो । जापानिज भाषा अध्ययन र परामर्श दिने संस्था एजुकेसन ग्रुपको आयोजनामा भएको प्रतियोगिताको फाइनलमा न्यू होराइजनले तिरुपाती एचआर सोलुसन प्रालीमाथि ६–० को सहज जित रच्यो ।

न्यू होराइजनका सुदीप लिम्बूले ह्याट्रिक पूरा गरे । टीका मगर र अनमोल राईले एक गोल थपेपछि न्यू होराइजनले सहज जित रचेको हो । युकिगुनी एजुकेसनल कन्सल्टेन्सीले तेस्रो स्थान प्राप्त गर्न सफल भयो । युकिगुनीले तेस्रो स्थानका लागि भएको खेलमा लोमस अब्रोड स्टडी प्रालीलाई ६–० ले हराएको थियो ।

एकदिने प्रतियोगितामा भएको पहिलो सेमिफाइनलमा न्यू होराइजनले युकिगुनीलाई ६–३ ले हराएको थियो । दोस्रो सेमिफाइनलमा तिरुपातीले लोमस एजुकेसनललाई ४–२ ले हराउँदै उपाधि भिडन्त तय गरेको हो । प्रतियोगिताको बेस्ट गोलकिपर च्याम्पियन न्यू होराइजनका अनमोल राई घोषित भए । बेस्ट प्लेअरको ट्रफी भने तिरुपातीका निखिल ढुङ्गानाले प्राप्त गरे ।

दुवैलाई जापानिज एजुकेशन ग्रुपका संयोजक रूपसिंह तामाङले ट्रफी हस्तान्तरण गरे । विजेता न्यू होराइजनले एक लाख र उपविजेता तिरुपाती एचआरले ७५ हजार रुपैयाँसहित ट्रफी प्राप्त गरे । उनीहरूलाई जापानिज एजुकेशन ग्रुपका संयोजक रूपसिंह तामाङले ट्रफी प्रदान गरेका थिए ।

सो अवसरमा जापानिज एजुकेशन ग्रुपका संयोजक रूपसिंहले आगामी दिनमा पनि आफ्नो संस्थाले खेलकुदमा विभिन्न प्रतियोगिता र प्रोत्साहन कार्यक्रम आयोजना गर्दै स्वच्छ नागरिक उत्पादनमा मद्दत पुर्‍याउने विश्वास व्यक्त गरे ।

तेस्रो स्थानको युकिगुनीले ५० हजार रुपैयाँ प्राप्त गर्‍यो । उक्त प्रतियोगितामा कुल १० टोलीले प्रतिस्पर्धा गरेका थिए । लिग कम नकआउटका आधारमा भएको प्रतियोगितामा सहभागी टोलीलाई दुई समूहमा विभाजन गरिएको थियो । एकदिने प्रतियोगिताको उद्घाटन नेपाली तेक्वान्दो ओलम्पियन तथा दक्षिण एसियाली खेलकुद (साग) का कीर्तिमानी चार स्वर्ण पदक विजेता दीपक बिष्टले गरेका थिए ।