लगातार १६ खेलको अपराजित यात्रालाई निरन्तरता दिने लक्ष्यसहित बेल्जियमले जारी विश्वकप फुटबलअन्तर्गत अन्तिम ३२ को खेलमा आज सेनेगलसँग प्रतिस्पर्धा गर्दैछ। सियाटल स्टेडियममा हुने यो खेल नेपाली समयअनुसार राति १:४५ बजे सुरु हुनेछ।
समूह चरणमा प्रभावशाली प्रदर्शन गर्दै नकआउट चरणमा पुगेको बेल्जियम उच्च मनोबलका साथ मैदान उत्रिँदैछ भने अफ्रिकन कप अफ नेशन्सको उपविजेता सेनेगल पुनरागमनको लय कायम राख्ने लक्ष्यमा रहेको छ।
बेल्जियमका प्रशिक्षक रुडी गार्सियाका लागि सुखद पक्ष टोलीका अधिकांश खेलाडी पूर्ण रूपमा फिट हुनु हो। यसले उनलाई रणनीतिमा विभिन्न विकल्प प्रयोग गर्ने अवसर दिएको छ। विङ्गर जेरेमी डोकु पारिवारिक कारणले केही समय स्वदेश फर्किए पनि समूह चरणको अन्तिम खेलमा न्यूजिल्यान्डविरुद्ध मैदान फर्किसकेका छन् र अहिले पूर्ण रूपमा खेल्न तयार छन्।
डिफेन्डर नाथन एनगोए एक खेलको निलम्बनपछि टोलीमा फर्किएका छन्। यद्यपि अर्का डिफेन्डर जेनो डिबास्ट प्रशिक्षणमा फर्किए पनि चोट दोहोरिने जोखिमका कारण उनलाई आराम दिइन सक्ने सम्भावना रहेको छ। आक्रमणमा अनुभवी स्ट्राइकर रोमेलु लुकाकु पूर्ण फिट भए पनि सुरुआती रोजाइमा पर्ने सम्भावना कम देखिएको छ। गोलपोस्टमा थिबाउट कोर्टुवा र मिडफिल्डमा केभिन डी ब्रुयनको उपस्थितिले बेल्जियमलाई थप सन्तुलित बनाएको छ।
यता, सेनेगलका लागि गोलरक्षक एडुआर्ड मेन्डीको फिटनेस मुख्य चिन्ताको विषय बनेको छ। नर्वेविरुद्धको खेलमा घुँडामा चोट लागेका कारण उनी खेल्ने सम्भावना अनिश्चित छ। यदि उनी अनुपस्थित भए मोरी डियावले सुरुआत गर्ने सम्भावना छ।
फरवार्ड लाइनमा साडियो माने, निकोलस ज्याक्सन र इस्माइला सार जस्ता खेलाडीका कारण सेनेगल आक्रमणमा खतरनाक देखिएको छ। कठिन यात्रा पार गर्दै नकआउट चरणमा पुगेको सेनेगलले बलियो बेल्जियमलाई कडा चुनौती दिने अपेक्षा गरिएको छ।
प्रतिक्रिया