१९ वैशाख, काठमाडौँ । पूर्व सचिव भिम उपाध्यायले नेपालका केही राजनीतिक दल र नेताहरूको शक्तिको स्रोत ‘नक्कली सुकुम्बासी’ को आवरणमा रहेका ‘हुकुमबासी’ बस्तीहरूमा लुकेको टिप्पणी गर्नुभएको छ। सामाजिक सञ्जाल मार्फत आफ्नो धारणा राख्दै उहाँले वर्तमान राजनीतिक बेथिति र नदी किनारको अतिक्रमणलाई रामायणको रावण बधको प्रसङ्गसँग तुलना गर्नुभएको हो।
उपाध्यायका अनुसार, जसरी रावणका १० वटा टाउका भए पनि उसको प्राण नाइँटोमा लुकेको थियो र विभिषणले सो रहस्य खोलेपछि मात्र रामले रावणको अन्त्य गर्न सफल भएका थिए, त्यसै गरी नेपालका ‘बामे’ र उनीहरूबाट संक्रमित अन्य नेताहरूको ‘प्राण’ पनि सार्वजनिक जमिन कब्जा गरी बसेका बस्तीहरूमा अडिएको छ।
उहाँले ती बस्तीहरूलाई वास्तविक सुकुम्बासीको नभई ‘हुकुमबासी’ हरूको अखडा भएको आरोप लगाउनुभएको छ। “सार्वजनिक जमिन एवं नदी खोला किनार कब्जा गरी बसेका र वर्षको अर्बौँ भाडा असुल्ने हुकुमबासी बस्तीहरू नै यी नेताहरूको शक्तिको स्रोत हुन्,” उपाध्यायले भन्नुभएको छ।
प्रधानमन्त्री बालेन्द शाह (बालेन)ले यो ‘राजनीतिक नाइँटो’ को रहस्य पत्ता लगाएको र अहिले उनले त्यहीँ अचुक बाण प्रहार गरिरहेको उहाँको तर्क छ। नदी किनारका अनधिकृत संरचना र अतिक्रमण हटाउने बालेनको अभियानले नेताहरूको शक्ति केन्द्रमा प्रहार गरेको र यसले अन्ततः राजनीतिक शुद्धीकरणमा मद्दत पुग्ने उहाँले उल्लेख गर्नुभयो।
अन्तमा, उपाध्यायले हुकुमबासीहरूको कब्जाबाट वास्तविक सुकुम्बासीहरू मुक्त नभएसम्म मुलुकमा सुशासन नआउने दाबी गर्नुभएको छ। उहाँका अनुसार यो ‘रावण राज्य’ को अन्त्य भएपछि मात्र सुकुम्बासीहरूका निम्ति सही अर्थमा ‘रामराज्य’ को आरम्भ हुनेछ।
प्रतिक्रिया