१७ चैत्र २०७७ काठमाडौ, नेपाल कम्युनिस्ट पार्टी (नेकपा) को नाम विवादको बिषयमा सर्वोच्च अदालतले गरेको फैसला पुनरवलोकनका लागि माओवादी केन्द्रका अध्यक्ष पुष्पकमल दाहाल (प्रचण्ड ) आफैँ सर्वोच्च अदालत पुगेका छन्।

सर्वोच्च अदालतले २०७५ जेष्ठ ३ गते तत्कालीन नेकपा एमाले र माओवादी केन्द्र एक भएर बनेको नेकपा बदर गरिदिएपछि मंगलबार बिहान पौने १२ बजे प्रचण्ड सर्वोच्च अदालत पुगेका हुन ।

अध्यक्ष प्रचण्डसँगै माओवादी केन्द्रका नेता हरिबोल गजुरेल, गिरिराजमणि पोखरेल, वर्षमान पुन लगायतका नेताहरु सर्वोच्च पुगेका छन । सर्वोच्च अदालतले गत फागुन २३ गते उक्त फैसला गरेको थियो।

फैसलापछि दुई पार्टी एमाले र माओवादी केन्द्र ब्युँतिएका थिए । पार्टीको नाम विवादबारे ऋषि कट्टेलले २ वर्षअघि हालेको मुद्दामा सर्वोच्च अदालतले उनकै नेकपा वैधानिक र एमाले–माओवादी केन्द्र मिलेर बनेको नेकपा अवैधानिक भनेर फैसला गरेको थियो।

पुरानै दुई दल कायम गरिदिएपछि नेकपाबाट अलग्गिएका एमाले र माओवादीका कतिपय नेता अदालतले मागदाबीभन्दा बढी फैसला गरेर ‘राजनीतिक’ निर्णय गरेको भन्दै असन्तुष्ट छन्। यसै क्रममा प्रचण्डले फैसलाविरुद्ध पुनरवलोकन गर्ने निर्णय गर्दै कानुनविद्सँग परामर्श गरि सर्वोच्च अदालत पुगेका हुन ।