काठमाडौं, २८ फागुन । मुलुकले अब शान्तिको बाटो पक्रेको छ । दश वर्षे सशस्त्र युद्धको अन्त्यपछि खुसी भएका नेपाली नागरिक पुनः त्रसित बन्न पुगेको अवस्थाको पनि पटाक्षेप भएको छ ।

दश वर्षे सशस्त्र युद्धमा माओवादीका सबै नेता कार्यकर्ता भूमिगत थिए । र, पछिल्लो समयमा नेकपा विप्लवका नेताहरु सरकारसँग शान्तिको हात मिलाउन अघि २ बर्ष देखि भूमिगत नै थिए । तर उनीहरु प्रतिबन्धित र भूमिगत समयमा कहाँ बस्थे र कसरी सुरक्षित रहन्थे भन्ने चासो भने आम नेपालीमा छ ।

खोज अनुसन्धानको क्रममा हामीले यस्तै एउटा घर फेला पारेका छौ काठमाडौंमा जहाँ तत्कालीन विद्रोही नेकपा माओवादी र नेकपा विप्लव समूहका नेताहरुले बर्षौदेखि प्रयोग गर्दै आइरहेका छन् ।

यही हो, विप्लव नेतृत्वको नेकपाको प्रवक्ता खड्गबहादुर विश्वकर्मा प्रकाण्ड र केन्द्रीय सदस्य दीपक चलाउनेले सरकारसँग वार्ता अवधिभर प्रयोग गरेको घर । जुन घरले देशलाई शान्ति प्रक्रियामा ल्याउन महत्वपूर्ण भुमिका खेलेको छ ।

सरकार र विप्लवसँगको वार्ता अवधिभर विप्लवका दुई नेताले प्रयोग गरेको यो घर जनयुद्धका समयमा विभिन्न नेताहरुले समेत प्रयोग गर्दै आएका थिए । युद्धकालीन समयमा वर्तमान गृहमन्त्रीले समेत प्रयोग गरेको यो घर देश युद्धविरामको अवस्थामा गएपछि नेताहरुले विर्सेका थिए ।

काठमाडौँका व्यवसायी अशोक श्रेष्ठको यो घर, देशका राजनीतिक व्यक्तित्वहरुले कठिन समयममा प्रयोग गरेका थिए । देशको आमूल परिवर्तन पाउने आशामा अशोकले यो घर प्रयोगमा दिएको भएपनि नेतृत्वमा पुगेपछि विर्सेको गुनासो रहेको छ ।

यस्ता धेरै घरहरु छन् काठमाडौंमा, जहाँ सशस्त्र युद्धका दौरानहरुले भूमिगत बसेका नेताहरुले प्रयोग गर्दै आएका थिए । तत्कालीन नेकपा मालेका नेताहरुले पनि नेकपा माले प्रतिबन्धित रहदा पनि वर्तमान प्रधानमन्त्री केपी शर्मा ओली, माधवकुमार नेपाल र झलनाथ खनाललगायतले काठमाडौंमा बसेर आफुहरुको आन्दोलनलाई अगाडि बढाएका थिए ।

अहिले पनि नेकपा अध्यक्ष पुष्पकमल दाहाल भाडाको घरमा नै बस्दै आएका छन् भने धेरै नेताहरुले भने आफ्नै महल ठड्याइसकेका छन् । तर बसेको घरलाई विर्सने बानी भने अधिकांश नेताहरुमा देखिएको गुनासो घरबेटीहरुले गर्दै आएका छन् ।