आर्थिक वर्ष २०८३/८४ को पहिलो त्रैमासमा सिँचाइ आयोजनाहरूले उल्लेखनीय प्रगति हासिल गरेका छन्।
जलस्रोत तथा सिँचाइ विभागले तीन महिनामा कुल २३९.३ करोड रुपैयाँ खर्च गरेको छ, जसमध्ये ८८ प्रतिशत रकम पुँजीगत अर्थात् निर्माण कार्यमा खर्च भएको छ।
विभागका महानिर्देशक दिनेश रजौरियाका अनुसार महाकाली सिँचाइ आयोजनाले त्रैमासिक भौतिक लक्ष्यको ९७.२ प्रतिशत प्रगति गर्दै ४३.७ करोड रुपैयाँ खर्च गरेको छ। यो आयोजनाको त्रैमासिक बजेटभन्दा अढाई गुणाभन्दा बढी हो।
त्यस्तै, बबई सिँचाइ आयोजनाले ८१.८ प्रतिशत, सिक्टाले ८०.२ प्रतिशत र रानी जमरा कुलरियाले ७१ प्रतिशत भौतिक प्रगति हासिल गरेका छन्।
यी चार ठूला आयोजनामा मात्रै १३९ करोड रुपैयाँ खर्च भएको छ, जुन विभागको कुल खर्चको ५८ प्रतिशत हो।
यसैगरी, प्रगन्ना–बड्कापथ आयोजनाले ८८.२ प्रतिशत प्रगति गर्दा गहिरो ट्युबवेल सिँचाइ आयोजना र सिँचाइ संस्थागत विकास कार्यक्रमले शतप्रतिशत लक्ष्य पूरा गरेका छन्।
विभागले तयारी पूरा भएका आयोजनामा बजेट र निर्माण कार्यलाई तीव्रता दिएको जनाएको छ।
दोस्रो त्रैमासमा ढिलो सुरु भएका आयोजनालाई समेत गति दिने लक्ष्य राखिएको महानिर्देशक रजौरियाले बताएका छन्।
प्रतिक्रिया