अमेरिकी राष्ट्रपति डोनाल्ड ट्रम्पको प्रशासनकी आलोचक डेमोक्रेटिक सांसद इल्हान उमरको घरमा सोमबार संघीय एजेन्टहरूले आपराधिक अनुसन्धानका क्रममा खानतलासी गरेका छन्।
होमल्यान्ड सेक्युरिटी इन्भेस्टिगेसन (एचएसआई) का एजेन्टहरूले खानतलासी गरेका हुन्। तर, अनुसन्धानको विषय र खानतलासी गर्नुको कारणबारे विस्तृत जानकारी सार्वजनिक गरिएको छैन। अमेरिकी न्याय मन्त्रालयले सोमबार वासिङ्टन डिसी क्षेत्रमा अदालतबाट अनुमति लिएर खानतलासी गरिएको पुष्टि गरेको छ। मन्त्रालयका अनुसार यो कारबाही संघीय आपराधिक अनुसन्धानको एक हिस्सा हो।
ट्रम्प प्रशासनको आलोचना गर्दै आएकी उमरमाथि यसअघि पनि रिपब्लिकन नेताहरूले विभिन्न आरोप लगाउँदै आएका छन्। अमेरिकी उपराष्ट्रपति जेडी भान्सले उमरमाथि आप्रवासनसम्बन्धी ठगी गरेको आरोप लगाएका थिए। उमरले भने उक्त आरोप अस्वीकार गर्दै आएकी छन्।
भान्सले मे महिनामा पत्रकारहरूसँग कुरा गर्दै उमरमाथि अनुसन्धान गरिने बताएका थिए। ‘यसमा केही शंकास्पद कुरा छ जस्तो लाग्छ। तर, कानुनअनुसार सबै जना समान न्यायको हकदार छन्। त्यसैले हामी यसको अनुसन्धान गर्नेछौँ,’ उनले भनेका थिए।
रूढिवादी पोडकास्टर बेनी जोनसनसँगको अन्तर्वार्तामा भान्सले उमरले अमेरिकाविरुद्ध आप्रवासन ठगी गरेको आफूहरूलाई लागेको बताएका थिए। तर, उनले आफ्नो आरोपको समर्थनमा सार्वजनिक रूपमा प्रमाण प्रस्तुत गरेका थिएनन्। उनले ह्वाइट हाउसका उपप्रमुख स्टेफन मिलरसँग उमरमाथि कानुनी कारबाही गर्न सकिने उपायबारे छलफल भइरहेको पनि बताएका थिए।
उमरको कार्यालयले यसअघि भान्सको आरोपलाई बनावटी र मानहानि गर्ने खालको भन्दै खारेज गरेको थियो। उनका प्रमुख सहयोगी कोनर म्याकनटले मार्चमा जारी गरेको विज्ञप्तिमा उक्त आरोपलाई ‘हास्यास्पद झूट’ भनेका थिए। उनले ट्रम्प प्रशासनले अन्य राजनीतिक तथा आर्थिक विषयबाट जनताको ध्यान हटाउन यस्तो आरोप लगाएको दाबी गरेका थिए।
उमर सन् २०१८ मा मिनेसोटाको पाँचौँ निर्वाचन क्षेत्रबाट अमेरिकी प्रतिनिधिसभामा निर्वाचित भएकी थिइन्। उनी ट्रम्पका नीतिको आलोचना गर्दै आएकी छन्। उनी डेमोक्रेटिक पार्टीको प्रगतिशील धारकी नेताका रूपमा चिनिन्छिन्।
यद्यपि, खानतलासी र उमरमाथि यसअघि लगाइएका आरोपबिच सम्बन्ध रहेको अधिकारीहरूले पुष्टि गरेका छैनन्।
प्रतिक्रिया