इजरायली राष्ट्रपति आइज्याक हर्जोगले बिहीबार पाँच इजरायली यात्रुलाई ‘वीरता’ पुरस्कार दिने घोषणा गरेका छन्। ती यात्रुले फ्लाईदुबईका सह–चालकलाई नियन्त्रणमा लिई आफूहरू सवार विमान दुर्घटना गराउने प्रयास रोकेका थिए।
‘तपाईंहरूले अरूलाई बचाउन आफूलाई जोखिममा पार्नुभयो र ठूलो विपत्ति रोक्नुभयो। आज संसारले इजरायली समाजको सुन्दर र साहसी अनुहार देख्यो,’ इजरायलमा मुख्यतः औपचारिक भूमिकामा रहेका राष्ट्रपति हर्जोगले जारी गरेको एक वक्तव्यमा भनेका छन्।
‘म तपाईंहरूमाथि गर्व गर्छु र इजरायलको तर्फबाट धन्यवाद दिन्छु,’ उनले भने। उनले विमान चालक भारतीय नागरिक स्मित मच्छाको पनि मुक्तकण्ठाले प्रशंसा गरेका छन्।
इजरायली अधिकारीहरूका अनुसार सह–पाइलटले चक्कु प्रहार गरेपछि स्मितले ककपिटको ढोका खोली यात्रु र चालकदलका सदस्यलाई सूचना दिएका थिए। उनीहरूको सहयोगमा आक्रमणकारीलाई नियन्त्रणमा लिएर विमान बचाउन उनी सफल भएका थिए।
हर्जोगको कार्यालयले सुरुमा चार जना पुरस्कार विजेताको नाम घोषणा गरेको थियो। पछि पाँचौँ व्यक्तिका रूपमा ताली मानेसको नाम थपिएको थियो। उनका पति पहिले पुरस्कार दिने घोषणा गरिएका चार जनामा समावेश थिए।
राष्ट्रपतिको कार्यालयका अनुसार मानेसले ककपिटमा हल्लीखल्ली सुनेर पहिलो पटक यात्रुहरूलाई सचेत गराएकी थिइन् र सहयोग मागेकी थिइन्।
राष्ट्रिय नागरिक वीरता पुरस्कार पाउने अन्य इजरायलीमा यानिभ हायुन पनि छन्। उनी पेशाले प्लम्बर हुन्। उनले ककपिटमा पसेर सह–चालकलाई नियन्त्रणमा लिन पहिलो पहल गरेका थिए।
हायुनलाई रगत लागेको सर्टमै बुधबार इजरायल फर्केपछि बेन गुरियन विमानस्थलमा प्रधानमन्त्री बेन्जामिन नेतान्याहुले व्यक्तिगत रूपमा स्वागत गरेका थिए।
यात्रुहरूले एक महिलाले चिच्याएर चालकलाई चक्कु प्रहार भएको बताएपछि हायुन ककपिटतिर दौडेर गएका थिए। उनले आक्रमणकारी सह–चालकलाई नियन्त्रणमा लिन सहयोग गरेका थिए।
‘यो असाधारण घटना थियो,’ आक्रमणकारीलाई नियन्त्रणमा लिन सहयोग गर्ने र पुरस्कार पाउने आसफ राजुआनले उद्धारकार्यबारे राष्ट्रपतिसँगको प्रतिक्रियामा भने।
‘हामी असहाय महसुस गर्दै थियौँ, हावामा तैरिरहेका थियौँ र यो कार्य आफू बाँच्न, परिवार, मानिस र बच्चाहरूलाई बचाउन निर्विकल्प कार्य थियो,’ उनले भने।
प्रतिक्रिया