चन्द्रपुर नगरपालिका–७ स्थित रंगपुर साझेदारी वन क्षेत्रमा रातिको संयुक्त वन गस्तीका क्रममा साल जातको २४.७० क्युबिक फिट गोलिया काठसहित एक जना पक्राउ परेका छन्।
पक्राउ पर्नेमा चन्द्रपुर नगरपालिका–७, नयाँबस्ती कटानीका अनिल राम रहेका छन्।
चन्द्रपुर सब–डिभिजन वन कार्यालय र रंगपुर साझेदारी वनबाट खटिएको संयुक्त टोलीले नयाँबस्ती कटानी क्षेत्रबाट उत्तरतर्फ काठ ओसारपसार भइरहेको अवस्थामा रामलाई नियन्त्रणमा लिएको हो।
गस्ती टोलीले उनको साथबाट साल जातको ५ थान गोलिया काठ, काठ ओसारपसारमा प्रयोग भएको ३ थान साइकल र १ थान पिन्चा (आरा) समेत बरामद गरेको वन कार्यालयले जनाएको छ।
पक्राउ परेका राम तथा बरामद काठ र अन्य सामग्रीलाई आवश्यक कानुनी कारबाहीका लागि डिभिजन वन कार्यालय, रौतहटमा बुझाइएको छ।
घटनाका सम्बन्धमा थप अनुसन्धान भइरहेको डिभिजन वन कार्यालयले जनाएको छ।
वन क्षेत्रमा अवैध रूपमा काठ कटान तथा ओसारपसार नियन्त्रण गर्न नियमित गस्ती तथा निगरानीलाई तीव्र पारिएको वन कार्यालयको भनाइ छ।
प्रतिक्रिया