अमेरिकी नागरिक म्याथ्यू आरोन भ्यान्डिकसहित ६ युक्रेनी नागरिक भारतको तिहाड जेलबाट रिहा भएका छन्।
विशेष एनआईए अदालतको आदेशपछि उनीहरूलाई एक महिनाका लागि भारत छोडेर आ–आफ्ना परिवार भेट्न अमेरिका र युक्रेन जान अनुमति दिइएको हो। राउज एभिन्यूस्थित विशेष एनआईए अदालतले बिहीबार विदेश यात्रा गर्न अनुमति दिएको थियो। एनआईए न्यायाधीश प्रशान्त शर्माले विदेश यात्रा गर्ने अधिकार भारतको संविधानअन्तर्गत मौलिक अधिकारको विस्तार भएको बताएका थिए।
अदालतले उनीहरूलाई एक महिनापछि भारत फर्किन र फर्किएको ७२ घण्टाभित्र अदालतलाई जानकारी गराउन निर्देशन दिएको छ। साथै, २४ घण्टाभित्र आफ्नो आवासीय ठेगाना, मोबाइल नम्बर र इमेलको विवरण एनआईएलाई उपलब्ध गराउन आदेश दिएको छ।
उनीहरूले एनआईएको अनुसन्धानमा भिडियो कल वा भौतिक रूपमा सहभागी हुनुपर्नेछ। काम गर्ने मोबाइल नम्बर नभए परिवारका सदस्यको नम्बर उपलब्ध गराउन सक्ने र गन्तव्यमा पुगेपछि एक साताभित्र आफ्नो काम गर्ने मोबाइल नम्बर उपलब्ध गराउनुपर्ने अदालतले जनाएको छ।
एनआईएले सेप्टेम्बर ८ मा दायर गरेको पहिलो आरोपपत्रमा अध्यागमन तथा विदेशी ऐन, २०२५ अन्तर्गतका कसुर मात्र समावेश गरेको र गैरकानुनी गतिविधि (रोकथाम) ऐन (यूएपीए) अन्तर्गत आरोप नलगाएको बताइएको छ। यसैबिच, उनीहरूलाई अदालतले पूर्वनिर्धारित जमानत दिएको थियो।
भारतको विदेशी क्षेत्रीय दर्ता कार्यालय (एफआरआरओ) ले अध्यागमनसम्बन्धी कसुरमा कम्पाउन्डिङ गर्दै प्रत्येक अभियुक्तलाई पाँच लाख ५० हजार भारतीय रुपैयाँ जरिवाना तोकेको बताइएको छ।
अदालतले उनीहरूलाई विदेश जान अनुमति दिए पनि एनआईएको अनुसन्धान जारी रहनेछ। अनुसन्धानका क्रममा बोलाइए उनीहरूले भिडियो कन्फरेन्समार्फत सहभागी हुनुपर्नेछ।
यसैबिच, उनीहरूलाई रिहा गरी भारतबाट बाहिर जान अनुमति दिइएको विषयमा भारतमा राजनीतिक विरोध पनि भएको छ। भारतीय कांग्रेससहित विपक्षीले सरकारमाथि प्रश्न उठाउँदै अमेरिकी दबाबका कारण उनीहरूलाई छुटाइएको आरोप लगाएको छ।
प्रतिक्रिया