सत्तारूढ राष्ट्रिय स्वतन्त्र पार्टी (रास्वपा) ले रसुवा बाढीमा परेर बेपत्ता भएका व्यक्तिहरूको मृत्यु प्रमाणपत्र दिन कानुनी अड्चन फुकाउन सरकारलाई सुझाव दिएको छ।
आइतबार बसेको पार्टीको सचिवालय बैठकले विपद् व्यवस्थापन र प्रधानमन्त्री बालेन शाहको आसन्न अमेरिका भ्रमणका विषयमा महत्त्वपूर्ण निर्णय गरेको हो।
बैठकमा बाढी पीडितको राहत र पुनर्स्थापनालाई सँगसँगै र प्रभावकारी रूपमा अगाडि बढाउने विषयमा छलफल भएको थियो।
रास्वपा उपसभापति एवं कानुनमन्त्री सोबिता गौतमले बेपत्ता भएकाहरूको शव पहिचान नभई तत्काल मृत्यु प्रमाणपत्र दिन कानुनी अड्चन रहेको ब्रिफिङ गरेकी थिइन्।
त्यसपछि बैठकले परिवारले चाहेमा बेपत्ताको मृत्यु प्रमाणपत्र दिन मिल्ने गरी तत्काल कानुनी बाधा फुकाउन सरकारलाई निर्देशन दिने निर्णय गरेको प्रवक्ता जगदीश खरेलले जानकारी दिए। यसका साथै डिएनए संकलन र शव व्यवस्थापनलाई छिटो टुंग्याउन पनि जोड दिइएको छ।
त्यस्तै, आगामी सेप्टेम्बर २२ देखि सुरु हुने संयुक्त राष्ट्रसंघको महासभामा भाग लिन मंगलबार अमेरिका जान लागेका प्रधानमन्त्री बालेन शाहको भ्रमणलाई सफल पार्न रास्वपाले पूर्ण साथ दिने निर्णय गरेको छ।
बैठकमा उपस्थित मन्त्रीहरूमार्फत रास्वपाले प्रधानमन्त्रीलाई महासभामा क्लाइमेट जस्टिसको मुद्दा सशक्त रूपमा उठाउन र रसुवा बाढीपछिको पुनर्निर्माणमा अन्तर्राष्ट्रिय सहयोगको अपिल गर्न सुझाव दिएको छ।
साथै, नेपालमा राजनीतिक परिवर्तनपछि रास्वपा नेतृत्वको सरकारले आर्थिक समृद्धिका लागि काम गरिरहेको सन्देश विश्व समुदायलाई दिनुपर्ने पार्टीको निष्कर्ष छ।
यसैबीच, रास्वपा सभापति रवि लामिछानेले संगठन बलियो बनाउन पार्टी, संसद् र सरकारबीचको दूरी घटाउनुपर्नेमा जोड दिएका छन्।
अन्योन्याश्रित सम्बन्ध रहेका यी तीनवटै निकायबीच समन्वय बलियो बनाएर जान उनले निर्देशन दिएका हुन्। साथै, सभापति लामिछानेले पार्टीका नेता, सांसद र समर्थकहरूलाई अनुशासनमा रहेर अगाडि बढ्न निर्देशनात्मक आग्रह समेत गरेको प्रवक्ता खरेलले बताए।
प्रतिक्रिया