इंग्लिस प्रिमियर लिगमा गएराति म्यानचेस्टर सिटीले कोभेन्ट्री सिटीलाई १-० ले पराजित गर्दै लगातार तेस्रो जित निकालेको छ। सिटीको जितमा एर्लिङ हालान्डले निर्णायक गोल गरे।
घरेलु टोली सिटीले खेलमा प्रभाव जमाए पनि कोभेन्ट्रीले बलियो रक्षात्मक प्रदर्शन गरेको थियो। अन्ततः हालान्डको गोल सिटीलाई तीन अंक दिलाउन पर्याप्त बन्यो। लगातार तीन खेल जितेपछि सिटीले प्रिमियर लिगमा आफ्नो बलियो सुरुआत कायम राखेको छ।
गएरातिकै अर्को खेलमा न्युक्यासल युनाइटेड र बर्नमाउथले २–२ को बराबरी खेले। बर्नमाउथले दुई गोलको अग्रता लिए पनि न्युक्यासलले उत्कृष्ट पुनरागमन गर्दै खेल बराबरीमा टुंग्यायो।
क्रिस्टल प्यालेसले फुलहमलाई ३–२ ले हराउँदै सिजनको पहिलो जित दर्ता गर्यो। त्यस्तै, नटिङ्घम फरेस्ट र टोटनहम हट्सपरले गोलरहित बराबरी खेले।
ब्रेन्टफोर्ड र सन्डरल्यान्डले १-१ को बराबरी खेल्दा ब्राइटन र लिड्स युनाइटेडबीचको खेल पनि समान १-१ को बराबरीमा सकियो। हल सिटी र एस्टन भिल्लाले भने गोलरहित बराबरी खेले।
आज प्रिमियर लिगमा दुई खेल हुँदैछन्। एभर्टनले म्यानचेस्टर युनाइटेडको सामना गर्दा अर्को खेलमा आर्सनल र चेल्सीबीच लन्डन डर्बी हुनेछ।
आर्सनल र चेल्सीबीचको खेल आजको सबैभन्दा आकर्षक खेलका रूपमा हेरिएको छ। दुवै टोली महत्वपूर्ण तीन अंक जोड्दै लिगमा आफ्नो स्थिति बलियो बनाउने लक्ष्यमा मैदान उत्रनेछन्।
आजका खेलमध्ये एभर्टन र म्यानचेस्टर युनाइटेडबीचको खेल नेपाली समयअनुसार साँझ ६ः४५ बजे तथा आर्सनल र चेल्सीबीचको खेल राति ९ः१५ बजे सुरु हुनेछ।
प्रतिक्रिया