विभिन्न सञ्चारमाध्यम तथा सामाजिक सञ्जालमा भदौ २३ र २४ गते पुनः सरकारविरुद्ध आन्दोलन हुने भन्दै आएका समाचारप्रति जेनजी अभियन्ता रक्षा बमले आपत्ति जनाएकी छिन्।
उनले आफू र जेनजी फ्रन्टको उक्त आन्दोलनसँग कुनै सम्बन्ध नरहेको स्पष्ट पारेकी हुन्। आन्दोलनसम्बन्धी प्रचारमा आफ्नो तस्बिरसमेत प्रयोग गरेर भ्रामक सूचना फैलाइएको भन्दै उनले असन्तुष्टि जनाएकी छन्।
सामाजिक सञ्जालमार्फत मंगलबार बमले तत्काल सरकारविरुद्ध आन्दोलन गर्नुपर्ने अवस्था आफूले नदेखेको बताइन्। उनले संवेदनशील विषयलाई सनसनी फैलाउने माध्यम नबनाउन र आफ्नो नाम तथा तस्बिर दुरुपयोग नगर्न आग्रह गरेकी छन्।
‘केही दिनदेखि भदौ २३ र २४ गते फेरि सरकारविरुद्ध आन्दोलन हुने भन्दै केही समूहले सामाजिक सञ्जालमार्फत सूचना फैलाइरहेका छन्। त्यसमा मेरो तस्बिरसमेत प्रयोग गरेर भ्रामक समाचार फैलाइएको देखिएको छ। यो सत्य होइन। म लगायत जेनजी फ्रन्टको यससँग कुनै सरोकार छैन,’ उनले भनेकी छन्।
बमले भदौ २३ र २४ गतेका घटनाको पीडा र क्षति अझै ताजै रहेको बताउँदै आन्दोलनजस्तो गम्भीर विषयलाई मजाक वा सनसनी फैलाउने माध्यम नबनाउन आग्रह गरिन्।
‘भदौ २३ र २४ गतेका घटना सम्झिँदा मात्रै पनि आङ सिरिङ्ग हुन्छ। ती दिनको पीडा र क्षति अझै ताजै छ,’ उनले भनेकी छन्, ‘त्यसैले आन्दोलनजस्तो गम्भीर विषयलाई मजाक र सनसनी फैलाउने माध्यम बनाइएको देख्दा झन् दुःख लाग्यो।’
उनले आफूहरू शान्तिको पक्षमा रहेको बताउँदै सरकारविरुद्ध तत्काल आन्दोलन गर्नुपर्ने अवस्था नरहेको धारणा व्यक्त गरेकी छन्।
‘हामी शान्ति चाहन्छौँ र मलाई सरकारविरुद्ध आन्दोलन गर्नुपर्ने अवस्था छ जस्तो पनि लाग्दैन,’ बमले भनेकी छन्।
प्रतिक्रिया