बेइजिङको ‘आइस रिबन’ स्टेडियममा जारी दोस्रो विश्व ह्युमनोइड रोबोट खेल (डब्ल्युएचआरजी) मा एक चिनियाँ ह्युमनोइड रोबोटले १०० मिटर दौडको मानव विश्व रेकर्ड तोडेको छ।

शनिबार साँझ भएको प्रारम्भिक दौडमा तियानझुओ टोलीद्वारा विकसित ह्युमनोइड रोबोटले ९.३९ सेकेन्डमा नै १०० मिटर दूरी पार गर्दै नयाँ इतिहास रचेको हो। यसअघि सन् २००९ मा जमैकाका धावक उसेन बोल्टले ९.५८ सेकेन्डमा यो दूरी पार गरी विश्व रेकर्ड बनाएका थिए।

बन्दुकको आवाजसँगै सुरु भएको उक्त प्रतियोगितामा तीन वटा ह्युमनोइड रोबोटहरूले उत्कृष्ट गति प्रदर्शन गरे। सुरुदेखि नै प्रतिस्पर्धात्मक बनेको दौडमा तियानझुओको रोबोटले एक शरीरको लम्बाइको अन्तरले पहिलो रेखा पार गर्न सफल भयो। गत वर्षको प्रतियोगितामा यस विधामा उत्कृष्ट नतिजा २१.५० सेकेन्ड रहेकोमा यसपटक रोबोटले समयलाई उल्लेख्य रूपमा घटाएको पाइयो।

प्रतियोगितामा रोबोटहरूले केवल दौडमा मात्र नभई अन्य विधामा पनि मानव रेकर्डलाई पछि पारेका छन्। हाई जम्पतर्फ एक ह्युमनोइड रोबोट २.८८ मिटर उचाइ पार गर्न सफल भयो, जसले सन् १९९३ मा क्युबाका जेभियर सोटोमायरले बनाएको २.४५ मिटरको मानव रेकर्डलाई उछिनेको छ।

यस्तै, चिनियाँ स्मार्टफोन निर्माता कम्पनी अनरको लाइटनिङ रोबोटले परीक्षणका क्रममा ९.३२ सेकेन्डमै १०० मिटर स्प्रिन्ट पूरा गरेको थियो भने यसै वर्षको ह्युमनोइड हाफ-म्याराथन (२१ किलोमिटरको दौड) ५० मिनेट २६ सेकेन्डमा पार गरेको थियो।

सन् २०२२ शीतकालीन ओलम्पिकका लागि निर्मित राष्ट्रिय स्पीड स्केटिङ ओभलमा भइरहेका यी खेलहरूमा जर्मनी, जापान र अमेरिकासहित १६ देशका सयौँ टोलीहरू सहभागी छन्।

प्रतियोगितामा भारोत्तोलन, टग-अफ-वार, फुटबल, नृत्य र औद्योगिक-कार्यसम्बन्धी ५१ भन्दा बढी कार्यक्रमहरू समावेश गरिएका छन्। विज्ञहरूका अनुसार यस्ता मानवाकृत रोबोटहरू हाल प्रदर्शन र अनुसन्धानका लागि बढी प्रयोग भए तापनि यसले रोबोटिक्स प्रविधिमा आएको फड्कोलाई प्रष्ट पार्छ।

चीनले मानवोइड रोबोटहरूलाई आफ्नो रणनीतिक उदीयमान उद्योगको रूपमा अगाडि बढाएको छ। हालै अमेरिकी संघीय सञ्चार आयोगले विदेशी रोबोट आयातमा प्रतिबन्ध लगाए पनि चिनियाँ रोबोट निर्माताहरूले भने आफ्नो प्रविधिको विकास र विस्तारलाई तीव्र पारिरहेका छन्।

हालै युनिट्रीजस्ता चिनियाँ रोबोट निर्माता कम्पनीहरूको बजार मूल्य र सेयरमा आएको उच्च वृद्धिमार्फत पनि यस क्षेत्रप्रतिको लगानीकर्ताको आकर्षण प्रष्ट झल्किन्छ। एजेन्सी