चर्चित बेलायती हास्य कलाकार, टिभी होस्ट तथा प्रकृतिप्रेमी बिल ओडीको ८५ वर्षको उमेरमा निधन भएको छ।
म्यानचेस्टर नजिकै जन्मिएर बर्मिंघममा हुर्किएका ओडीले क्याम्ब्रिज विश्वविद्यालयको प्रख्यात फुटलाइट्स कमेडी समूहबाट आफ्नो हास्य तथा लेखन यात्रा सुरु गरेका थिए। स्नातकअघि नै उनले १९६० को दशकको सुरुदेखि विभिन्न व्यंग्यात्मक टिभी श्रृंखलाहरूका लागि काम गर्न थालेका थिए।
१९७० को दशकमा उनी कमेडी ट्रियो ‘द गुडीज’ मार्फत घरघरमा परिचित नाम बनेका थिए। ‘द गुडीज’ ले आफ्नै श्रृंखला पाएपछि उनीहरूको स्ल्यापस्टिक कमेडी र नवीन गीतहरूले १२ वर्षसम्म लाखौं दर्शकलाई मनोरञ्जन दिएको थियो। समूहमा उनी एक अराजकतावादी सदस्यका रूपमा चिनिन्थे भने उनका गीतहरू बेलायतको शीर्ष १० मा समेत पुगेका थिए।
समयसँगै उनले आफ्नो ध्यान वन्यजन्तु संरक्षण र पंक्षीविज्ञानतर्फ केन्द्रित गरे। बीबीसीको ‘स्प्रिंगवाच’ कार्यक्रमका पूर्वप्रस्तोता ओडीले ‘बर्डिङ विथ बिल ओडी’, ‘ब्रिटेन गोज वाइल्ड’ र ‘हाउ टु वाच वाइल्डलाइफ’ लगायतका लोकप्रिय वन्यजन्तुसम्बन्धी कार्यक्रमहरू सञ्चालन गरेर प्राकृतिक इतिहासप्रति जनचेतना फैलाउन ठूलो भूमिका खेलेका थिए।
उनको निधनमा गहिरो शोक व्यक्त गर्दै एजेन्ट डेभिड फोस्टरले ओडी एक बहु-प्रतिभाशाली सेलिब्रेटी, हास्य कलाकार, लेखक र वातावरणका सच्चा संरक्षक भएको बताएका छन्। फोस्टरले ओडीले सधैं मानिसहरूलाई वातावरणको सम्मान र संरक्षण गर्न प्रेरित गरेको स्मरण गरेका छन्।
जीवनको पछिल्लो चरणमा उनले डिप्रेसन र बाइपोलर डिसअर्डरसँगको संघर्षबारे पनि खुलेर कुरा गरेका थिए। वन्यजन्तु संरक्षण, प्रसारण तथा कला क्षेत्रमा पुर्याएको विशिष्ट योगदानको कदर गर्दै उनलाई २००३ मा प्रतिष्ठित ‘ओबीई’ (अफिसर अफ द अर्डर अफ द ब्रिटिश एम्पायर) सम्मान प्रदान गरिएको थियो।
प्रतिक्रिया