युक्रेनी सेनाले रूसका दुई प्रमुख तेल प्रशोधन केन्द्रहरूमा शक्तिशाली आक्रमण गरेको बताएको छ।
युक्रेनी राष्ट्रपति भोलोदिमिर जेलेन्स्की र अमेरिकी राष्ट्रपति डोनाल्ड ट्रम्पबिच वासिङ्टनमा भएको उच्चस्तरीय भेटवार्ताको केही घण्टापछि युक्रेनी सेनाले सो आक्रमण गरेको हो। युक्रेनले आफ्नो पछिल्लो लामो दूरीको हमलाअन्तर्गत रातभर उक्त आक्रमण गरेको जानकारी दिएको छ।
युक्रेनको सुरक्षा सेवा र जनरल स्टाफले दिएको जानकारीअनुसार युक्रेनबाट १५ सय किलोमिटरभन्दा टाढा रहेको रूसको पर्म क्षेत्रमा रहेको लुकोइल रिफाइनरी र सीमाबाट करिब ४०० किलोमिटर टाढा रहेको रियाजानको रिफाइनरीमा राति आक्रमण हुँदा भीषण आगलागी भएको थियो। युक्रेनका अनुसार यी रिफाइनरीहरूको संयुक्त वार्षिक उत्पादन क्षमता करिब २२ करोड ब्यारेल तेल रहेको छ। यसले रूसको सैन्य प्रयास तथा सरकारी राजस्वमा महत्त्वपूर्ण योगदान पुर्याउने उसको दाबी छ।
यो आक्रमण अमेरिकी राष्ट्रपति डोनाल्ड ट्रम्पसँग वासिङ्टनमा वार्ता गरेर युक्रेनका लागि थप सैन्य सहयोगको माग गरेको केही घण्टापछि नै भएको हो। ओभल अफिसमा भएको यस भेटका क्रममा दुई नेताहरूले रूससँगको शान्ति वार्ता पुनर्जीवित गर्ने र युक्रेनमा नै प्याट्रियट मिसाइल इन्टरसेप्टरहरू उत्पादन गर्ने योजनाहरूबारे विस्तृत छलफल गरेका थिए।
सामाजिक सञ्जालमा लेख्दै जेलेन्स्कीले भनेका छन्, ‘रूसले युद्धको हरेक दिन उच्च मूल्य चुकाउनु पर्ने महसुस गर्नुपर्छ र हामीले आक्रमणकारीलाई कमजोर बनाउनुपर्छ।’ यसअघि ट्रम्पसँगको भेटलाई जेलेन्स्कीले ‘राम्रो भेट’ भनेका थिए भने ट्रम्पले पनि बैठक ‘महान सम्मान’ भएको बताएका थिए।
यस वासिङ्टन भ्रमणमा जेलेन्स्कीले युक्रेनका कट्टर समर्थक तथा दिवंगत अमेरिकी सिनेटर लिन्डसे ग्राहमको सम्मानमा आयोजित अन्त्येष्टि कार्यक्रममा सहभागिता जनाउनुको साथै अमेरिकी क्यापिटलमा ६० भन्दा बढी सिनेटरहरूसँग भेटघाट गरेका थिए।
उनले फिनल्याण्डका राष्ट्रपति अलेक्ज्याण्डर स्टबसँग पनि समसामयिक विषयमा कुराकानी गरेका थिए। युक्रेनलाई ब्यालिस्टिक मिसाइलहरूबाट जोगाउन एन्टी-ब्यालिस्टिक प्रणाली र प्याट्रियट इन्टरसेप्टरहरूको अत्यधिक आवश्यकता रहेको कुरा उनले जोड दिएका थिए।
साथै, हतियार निर्माता कम्पनी लकहिड मार्टिनका अधिकारीहरूसँग पनि संयुक्त उत्पादन र प्रविधि आदानप्रदानको विषयमा छलफल भएको छ।
यता, रियाजानका गभर्नर पावेल माल्कोभले ड्रोन आक्रमणपछि छ जनालाई अस्पताल लगिएको जानकारी दिएका छन्। साथै, रूसी रक्षा मन्त्रालयले बुधबार आफ्नो हवाई प्रतिरक्षा प्रणालीले रातभर विभिन्न क्षेत्रमा २९५ युक्रेनी ड्रोन खसालेको दाबी गरेको छ।
युक्रेनले घरेलु प्रविधिबाट तयार पारेका लामो दूरीका ड्रोन र मिसाइलहरू प्रयोग गरी महिनौंदेखि रूसी तेल सुविधाहरूलाई लक्षित गर्दै आएको छ। एजेन्सीको सहयोगमा
प्रतिक्रिया